又到聖誕

叮！叮！叮！又到聖誕，又到聖誕 .. .. ..

有日無意中去咗海運，唔理天氣有幾凍，唔理落住幾大雨，都要去探吓“小天使”

 

太多人嘞！只好喺人群中穿插，幫“小天使”拍個照先

 

有朋友喺faebook問，點解天使仔要比人用膠箱困住 .. .. .. 其實哩個係佢嘅水晶球唻架！

又有一日，用五分鐘沖咗上朗豪坊影貓貓，但點解 .. .. .. 返工時間都仲咁多人架 (我都係用MA時間偷走出唻)

 彈琴嘅兔仔

仲有小小世界嘅聖誕篇

 

奈何 .. .. .. 到最後我都同唔到鼠鼠們影相，我只係見到佢哋個背影 .. .. ..

原來坐喺城堡前睇煙花，個感覺係唔同架！不過隔離坐咗對菲籍情侶，開場前喺咁用閃光燈玩自拍，我比佢個相機閃死咗 .. .. ..

 

 

堂記炸兩

終於食到堂記炸兩嘞！

某一個星期五，放咗學，去碰碰運氣，睇吓要等幾耐先有得食！

當然冇上次平日一去到就有位坐，但今次都只係等咗十多分鐘就有位嘞！

但人的確比平日多，連等碗粥嘅時間都耐咗，不過今晚竟然有炸兩！

堂記嘅炸兩，並唔係特別好食，但何解要令到為“佢”寫一篇網誌，係皆因 – 未食過！

唻咗幾次，炸兩定必售罄，我相信係因為佢嘅“油條”來貨 .. .. ..

不過 .. .. .. 都可以唔需要再試，留番碟quota叫多碟腸粉好過！

點解 .. .. .. 條油條好秀呀！又乾！再加上堂記出名嘅又滑又薄嘅皮，嗰一刻 .. .. . 真係唔知自己食咗啲咩落肚，就如食“風”一樣，唉！

Our NCS Course

星期初去咗training centre，上咗一個名為Natural Colour System嘅兩天課程，起初大家都唔係好清楚要做啲乜，只係知道要做一連串嘅workshop！

哩兩日內，我哋重覆又重覆咁做練習，務求要訓練自己嘅一雙眼睛，去分辨唔同嘅顏色。大家千其唔好以為好容易呀！要將相似嘅顏色再分類，要決定佢偏黑、偏白、偏紅、偏藍等等，而且仲要判斷埋佢究竟有幾多個percent係紅黃藍綠黑白 .. .. .. 係好困難架！

56張卡仔

首先要將佢哋分類

排列

對比

整理

最後嘅結果

哩啲就係哩兩日所做嘅練習

總括 .. .. .. 好好玩 .. .. . 不過玩到癲咗！

兒時最愛

天氣寒冷，除咗一杯熱騰騰嘅咖啡之外，暖笠笠嘅支裝維他奶都係一個好好嘅早餐之選！

而哩一支維他奶令我回想起小學時代，一支細支裝嘅，小食部都只係賣$1.2，大支裝都只係$1.5！

每日媽媽會比$1.5我返學校校，待小息時買一支大支裝嘅維他奶，做早餐飲料！而我每日偏偏儲起三毫子，只係要一支細支裝作早餐，剩低嘅，儲起佢，留返 .. .. .. 買雪條食！

Heehee！我真係識得慳家，而且又乖喎，冇叫媽媽添多些零用錢比我買零食，想食咩，都會自己儲起唻，有時仲同同學 share 一set 孖條，咁又可以再慳啲嘞！