蝸居

哩排啲心情嘅起伏都比較大，當中有內在因素﹝懷孕對身體嘅影響﹞，當然亦有外在因素﹝生活鎖事﹞！

最大煩惱都係住屋問題 – 蝸居！

有錢未必有租盤，有盤又未必租得起！

市區居屋單位，七百多尺建築面積，三房，高層，向西，企理裝修 .. .. .. 業主竟然開價 $12500 唔包管理費 .. .. .. 不愧係市區居屋王。

樓市刺熱，攪到連租金都飆升 .. .. .. 唉！

一個小孩要洗你四百萬，計埋條數，真係有可能！

好似我咁，首先計計因為小朋友而要搬屋，租金與供樓費用(incl管理費等雜項)相差三千多元；請外傭，未計雜費每月三千幾；加加埋埋，原區安置都要洗多六千幾；如果堅持住近娘家，住屋加車位租金，再多四千 .. .. ..

鬼唔知住近娘家嘅好處咩！鬼唔知住近工作地點嘅好處咩！

有錢都唔係咁洗發，更何況冇呢？

如果堅持住居屋王，租金加外傭再加自己洗費，成份人工都冇咗 .. .. .. 點過活呢？唔通真係要小虎妹一日多餐都用母乳餵哺？唔通唔用尿片改用尿布？ .. .. .. 唉！

MOS某一 Hotel Suite 住宅，房價只需 $8800，包全屋傢俬！再一次睇驗到廣告嘅威力！

我都預咗冇景加要住超低層 .. .. .. 誰知 .. .. .. $8800房間已全部租出，只係得 $11800 高層內街 及 $13800 高層向海先有房 .. .. .. 多晒！

裡面環境真係一流，有CLUB HOUSE，附近又有公園，空氣好，小虎妹一定住得好舒服，奈何 .. .. .. ！

好嘢通常都冇我份！

兩母女‧行街街！

隔個星期六，我就會帶小虎妹去食個超級豐富嘅高鈉早餐

 

兩個禮拜先一次，我唸對小虎妹嘅影響唔會太大啩。以前最喜愛茄汁豆加煙肉再加蘑菇，再加杯 illy咖啡。但自從有咗小虎妹後怕蘑菇會濕，所以改食更加唔健康嘅法蘭克福腸，亦都戎埋咖啡，最多只飲半杯奶茶。食量更加由以前食唔晒，到而家可以清晒 .. .. .. 食量變大了！

早兩日心情極差，唸住星期四去 shopping﹝好難得有一日冇跌watt，冇腰痛﹞，點知臨收工接到家姐call，要出車幫佢送姨甥去醫院做檢查，shopping night就咁就冇咗。還處星期六都要盪成兩個幾鐘先可以返屋企，咁就不如行街街啦﹝不過行到一半，都要搵地方坐吓，條腰都真係有啲倦啊﹞！

其實最想買嘅係一件簿身嘅黑色西裝褸，不過暫時都睇唔啱，反而買咗兩件T-shirt。

 

而家買衫，都要再預鬆啲，otherwise再過多個月又唔啱著了﹝皆因我已經冇啱身嘅夏天衫著了﹞！

我要繼續努力，搵我嘅西裝褸先！

廿八週

頭好痛！心情極差！小虎妹唔知係咪 feel 到，佢踢得好大力呀~~~！係唔係連你都要蝦 mama呀！

人哋話老公係自己揀架！有咩就要自己受晒佢囉！我已經好努力去學“放手”、“唔執著”等等嘅技巧，去令自己好過啲 .. .. .. 我仲可以點呀？！

個頭好痛呀 ~~~！

我已經要收埋收埋好多嘢，我都會有崩潰嘅一日架！

我已經好努力嘞！

哩排身體已經唔多妥！瞓唔到、食唔到、冇力、頭痛、見暈！半夜喺梳化，摸住小虎妹，再望出街 .. .. .. 有啲念頭 .. .. .. 再眼光光 .. .. .. 唔通真係要坐天光咩！

小虎妹好乖！半夜只會喺我摸佢嘅時候郁郁踼踢，係 mama 自己瞓唔到啫，唔關小虎妹事架！

你廿八週嘞﹝足七個月﹞！開始大個女嘞！

懷孕的身體狀況

一路只擔心自己會唔會患上妊娠糖尿，原來除咗糖尿，仲有妊娠貧血都需要留意！

經過之前幾次嘅急跌 watt (突然間感覺手軟腳軟、見暈、呼吸困難、心跳加速)，就算食埋朱古力，都毫無幫助，試過睇西醫(街症)時，心跳及血壓都屬正常，仲比醫生誤解我呃病假，唉！

咁 .. .. .. 何解會咁呢？

上星期去咗葵芳照4D，將我近期嘅症狀話咗比DR.知，佢即時糾正我，我有可能係血色素低，唔關血糖事 .. .. .. 血色素 .. .. .. ？經過上網嘅調查，原來係有妊娠貧血嘅一回事。當時DR.提議我下次返QE覆診時，可以叫政府幫我做多次 BLOOD TEST，而喺DR. 處做都只係$100，嗰一刻發咗瘟，一心唸住返QE驗血，其實可以叫DR. Cheung 幫我驗咗先(襯當時都在跌watt狀態)！

唉！懵咗！

哩幾日跌watt情況並冇改善，只係冇上次咁嚴重！

妊娠貧血嘅影響性比妊娠糖尿較少，但影響到紅血球嘅帶氧量，都有一定危險，所以血色素亦不能太低，otherwise寶寶會因為供氧不足而影響發育及甚至 .. .. ..

原來小虎妹哩期除咗興用臍帶扮頸巾外，仲有可能唔夠氧 .. .. ..

屋企部電腦 capture唔到video，暫時唔可以post啲4D相比大家睇！比多少少時間我，希望可以 capture 埋睇住佢踢我嗰幾秒嘅罪證同大家分享啦！

租盤仍未搵到！

企理樂富單位，要$13000；一城三房，要$10000；MOS海澄hotel suite，$8800嘅低層街境冇晒，最平得番$11000嘅高層街境 .. .. ..；陪月姨姨唔知肯唔肯入沙田幫手(上個月contact時，我記得有同佢提過可能會喺ST OR LF坐月)；而入境處來信話已經收到申請外籍工人嘅 application，而家處理梗；個衰妹又學人玩臍帶，如果仍堅持順產，佢出唻時會唔會勒得太緊而要緊急開刀呢？

仲有唔夠三個月 .. .. .. 而你又會唔會搶閘呢？會唔會未放產假就要出唻呢？政府產後最多放八個星期，隨時前後放唔足十個星期有薪產假。

唔知可唔可以一切順利呢？

唯有扮吓無知！開心活過每一天！

活多日，賺多日！

Show off !!!

終於買咗兩個膠箱暫放小虎妹嘅衣物，不過 .. .. .. 仍然係唔夠擺架！(好彩只係淨番雜物啫！)

Thanks Aunite Connie 幫小虎妹喺日本帶番唻嘅用品！

仲有哈哈姐姐未著過已經唔啱著嘅鞋仔，靚靚！

截止今日，小虎妹所擁有嘅名牌時裝！

多謝蕙蕙表姐嘅 bape kids bib .. .. ..

哩堆 mini and bape，已經貴過晒喺 taobao 網買嘅一切嬰兒用品了！(唔好話比 papa 知呀！全部都係 mama 啲私己唻架！)

一件喺日本帶番唻 (好貴啊!)，而另一 set 係經 HK agent 喺 zozo town 訂嘅 50% 貨品 (相對比單一件從日本買番唻嘅平咗四分一啊!)。雖然大家都係 50 碼，但係 set 裝細咗一個碼！

有請 "大舊衰" 做客席 model 先！

同場加影小虎妹之玩具篇

手玲 / 搖玲 -- 兩個；公仔都有兩個 .. .. .. 唉！