瞳瞳 兩歲生日會 之 麥記大派對 <後篇>

多謝各位送比瞳瞳嘅禮物, 返到屋企瞳瞳嘅情緒依然高漲
暫時仍然係最愛姨媽送嘅梳化仔 .... 瞳瞳唔比任何人坐, 要得到佢嘅邀請先可以

第二日放工返到屋企

瞳瞳 兩歲生日會 之 麥記大派對 <2>

3:30PM party 開始, 大家先叫啲嘢食, 傾下偈, 大約到 4:10PM party 姐姐就唻玩遊戲. 因為大部份都仲係小 bb, 所以都係玩啲簡單遊戲同唱下歌仔

party 姐姐帶令眾小朋友唱 ABC .... (其實我有少少想 中 個 party 姐姐 ..... , 扮聲都扮得幾驚, 不過我估小朋友係鍾意嘅)

玩完遊戲, 就到切 cake cake 嘞
嘩嘩嘩! 我為咗哩個蛋糕都唔知流咗幾多汗水 ..... 出到唻個效果好好. 希望瞳瞳大個睇返知道媽媽係好鍚佢啦. 出錢出力出心機, 仲要大熱天時腹大便便咁行去工廠區間 cake shop 傾下個蛋糕點整!

飲飽食醉後, 唻到壓軸遊戲 -- crazy balloon time (其實哩個環節我事先係唔知架. 因為我一路以為比 $230 訂一 set 汽球裝飾咁平, 之後喺要還返比麥記, 但原來我錯了. 全部波波可以原裝攞走, 又或者好似而家咁, 拆件比小朋友玩)
哩個環節, 比起由 party 姐姐帶令嘅 開心好多.

大家玩波波玩到 5:15 pm 都唔捨得走, 我見啲 party 姐姐亦好有禮貌咁喺出面等. 我哋唯有用九秘九收拾細軟離開

其中一個選擇入到去太和開 party 嘅原因, 係因為哩處有個 outdoor playground. book 場時已經問過, 如果天氣好的話, 出面 outdoor 係會開放比公眾人士入去玩, 只可惜嗰日雖然好似冇咩落過雨, 不過 outdoor 都冇開. 我估唔開放嘅其一原因, 係因為出面已經日久失收, 地下見到由屋村掉咗落唻嘅衫褲垃圾 ..... 真係可惜. 不過 overall 唻講 有大玻璃窗開嘅生日會係開心啲.

瞳瞳 兩歲生日會 之 麥記大派對 <1>

終於到生日會嘅大日子嘞! 雖然話就話星期日有場, 但都只係得返 3:30pm 開始, lunch 同 dinner 嘅時間都唔夾, 唯有當係 tea party 啦.
錯有錯著, 哩啲時間瞳瞳可以係屋企瞓個靚仔午睡, 之後開開心心咁出發. 唔知係咪真係知道自己開 party 做主角, 成個換衫出門口嘅過程都好聽話 (其實朝早都有少少扭計, 出發前仲要換著未著過嘅新衫 - 母女裝, 仲要係藍色)
兩手 fling fling 去開 party, 我都係第一次, 有啲唔慣


場地有 min. charge, 不過喺麥記開 P 貴極有限, 所以就加錢訂咗啲 BALLOON 裝飾 同 波波棒比小朋友做禮物. 由於大部份麥記場都只可容納 40 - 60 人, 太和麥記 max. 45人, 為免朋友們坐得好迫, 我只係請咗部分朋友, 希望其他朋友可以見諒

十

未有人唻, 跳番 part 舞先

舉起波波棒, 再跳

今日大解放, 可以食薯條, 雪糕, 同曲奇沙冰


待續 .......

瞳瞳 兩歲生日會 之 麥記大派對 <準備篇>

今年因為陀住妹妹, 又要開始準備入學嘅事, 瞳瞳生日會決定去麥當勞攪一場就算. 記得上年連埋 HOUSE WARMING 兩個月內開咗四場, 人都癲埋.

五月初開始籌備, 唸住都仲有大把時間, 一問之下又一城麥記嘅 WEEKEND 已經 FULL 到去八月 ...... 新城市亦得返夜晚 7:30PM 時段. 心水就腳嘅地方冇嘞. 唯有再唸唸. 官塘線 - 官塘太多人, 鑽石山同樂富好舊, PARTY 位置冇窗, 好暗. 黃大仙個場好細又嘈, 第一城雖然新裝修, 但 PARTY 位都係冇窗, 最後向北移, 揀咗太和獨立屋嘅麥當勞.

跟住就著手攪個蛋糕 ..... 蛋糕主題希望係瞳瞳最愛嘅芝麻街, 但可惜市面嘅芝麻街蛋糕造型大多都變哂老番樣, 最後決定喺市面搵 SESAME STREET 嘅 FIGURE, 再交比 CAKE SHOP 做 DECO ...... 但原來香港好難搵到有質數嘅 FIGURE (除非去廟街 $30 一盒有十隻嗰啲, 但放喺蛋糕上面始終唔放心擺入口食). 幾經波折終於喺 EBAY USA 搵到. 但之前因為某些原固, 到六月初都仲未開始喺 EBAY 落 BID, 結果最後用 UPS 寄唻 HK .... 運費仲貴過啲 FIGURE. (比我喺同一個 SELLER 處搵到架 SESAME STREET SCHOOL BUS, 瞳瞳大愛, 決定一拼訂回來)

雖然貴就貴咗啲, 但見佢每日都有玩架巴士, 又會擺啲公仔排隊上車 (雖然有時比咗排後面嘅公仔上車先, 但至少有一個排隊嘅 concept ..... 唯有再慢慢教), 都已經好滿足了. 哩 set FIGURE 同 架 SCHOOL BUS, 就當係你份生日禮物啦

希瞳 VS 駁咀 VS 傻豬豬

瞳瞳隨咗近排超痴身外, 我又發覺佢識多咗嘢嘞!

無意間發現, 佢識得叫自己做 "希瞳", 亦都知道 "我" 係代表自己 .... 而且仲開始識 駁咀

場景: 一家三口到餐廳晚飯, 瞳瞳要跟我坐, 因為冇 BB 櫈或 HIGHCHAIR, 全程兩頭郁
爸爸: 你唔好周圍郁, 再郁我過唻捉你同我坐
瞳瞳: 我走 ........
媽媽:

過咗一陣
爸爸: 下次唔帶你出街, 留低你喺屋企陪姐姐
瞳瞳: 好呀! 陪姐姐 ......
媽媽:

我忍笑忍得好辛苦啊 ~~~

背景: 近排瞳瞳咩都話唔好, 唔肯換衫, 唔肯換片, 每次我只比佢揀 "要媽媽換 定 姐姐換", 瞳瞳多數揀媽媽, 之後仲要扮 BB 叫我打橫抱佢.
媽媽: 你係瞳瞳豬 .... 咁媽媽係咩呀?
瞳瞳: 媽媽豬
媽媽: 咁爸爸呢?
瞳瞳: 爸爸豬
媽媽: 咁妹妹呢?
瞳瞳: 妹妹豬
媽媽: 咁姐姐呢?
瞳瞳: 姐姐豬
有時會無啦啦叫自己做 "傻豬豬"