買‧買‧買之戰車與戰船選擇篇

近排四出到訪各大公司﹝其實都係去咗吉豬島、十田、反斗王及護協等﹞嘅BB展，試探吓軍情同採購咗小部份日常用品﹝大家請放心，服裝採購暫時停止運作，待冷靜完畢後將再戰江湖﹞！

戰車戰船及總基地都仍在洽商中，當中以總基地嘅選購最為煩惱﹝其實係我麻煩﹞！

總基地

市面上有好幾個牌子﹝包括C-MAX、0/3 BABY、AIDA、LA BABY等等﹞，每個牌子又有好幾個型號！其實我都只係想買張冇公仔﹝我唔要LONELY TOON，更加唔要有PRINT喺張床處﹞，有三段高度調較，全白色嘅 .. .. .. 看似好簡單 .. .. .. 但有太多選擇嘞！當有一張睇得上眼嘅，線條優美，結實嘅 .. .. .. 原來係意大利牌子，要成三千蚊 .. .. .. 一張床仔啫，駛唔駛呀！睇睇吓又唸，有冇需要搵啲包埋原裝圍欄嘅，等小虎妹大個嘅時間，可以變番一張普通床仔呢？但又唸吓，可能到佢一歲嘅時間，要黏住我同大人瞓呢？選擇恐懼症又出現嘞！曾經有唸過喺TAOBAO網買BB床﹝其實已經上網睇中咗架嘞！GARCO嘅品牌，連埋運費都係千一蚊有找﹞，但最後比人否決咗！

戰車同戰船，只係喺兩個牌子當中選擇：COMBI VS APRICA

戰車

起初COMBI，之後因為靚靚波點嘅關係，就投向咗APRICA嘅懷抱，到近期因COMBI出咗新款，雖然車身較APRICA重，但啲鋼水好似較強，行車時較穩陣，同內籠較大，所以都應該COMBI勝出！

APRICA - 波點

 COMBI

COMBI - DX

戰船

戰船其實只係一張 high-chair﹝小虎妹大個用唻食糊仔食飯仔用﹞，只不過比普通high-chair多咗一個 function，就係搖籃！小虎妹new born嘅時候，就瞓喺high-chair午睡，櫈底有轆，方便靜雞雞將佢推唻推去，而且仲有搖籃功能，唔肯瞓就一於搖到你暈！

起初都係睇中COMBI，之後因為APRICA有埋太陽擋及蚊紗，而且除咗可以前後搖之外仲可以SWING，但近期就再同COMBI比較，發覺COMBI個腳踏可以郁動，喺平瞓狀態時摺起，形成一個兜，看上去就唔怕活潑好動嘅小虎妹碌咗落街 .. .. ..

APRICA  

 COMBI

都話我有選擇困難症啦！

而家十田大減價，部份貨品接近八折，由於上護協買COMBI嘅產品，都只係得個九折﹝但APRICA可以平成千蚊架﹞，所以要盡快決定買COMBI OR APRICA。但另一個難題，就係存放。問過十田，只存倉一個月，而反斗王，只存倉兩星期 .. .. .. 生活喺五平方尺嘅地方，又點樣安置佔十平方尺嘅物品呢？唯一嘅辦法 .. .. .. 擺返公司！公司都仲有好大個枱底可以暫作存放之用 .. .. ..