衝衝衝‧衝出香港之沖繩之旅 <一>

籌備咗個多月嘅沖繩之旅, 終於啟航 (其實個行程都係早兩日先編好)

瞳瞳第一次到香港機場, 見到個地方又大又高, 已經natural high了, 到咗閘口等上機, 好彩搵咗個角落 settle down (三邊有玻璃及牆身包圍), 但久唔久都比瞳瞳突破重圍, 成功逃走. 鬼咩, 比佢發現咗出面有好多 shop, 仲有玩具鋪, 多嘢睇, 比著係我都走佬.

可能因為係團體 ticket, 而且啟程前係由旅行社攞位, 所以冇安排到較前嘅位置比我哋, 不過都冇乜所謂, 因為瞳瞳哩程飛機尚算合作, taking off 時因為要坐定定, 所以唔耐煩, 我哋就唯有不斷比餅佢食. 飛機餐因訂位時冇order 到兒童餐, 航空公司比咗 baby food, 瞳瞳第一次食樽裝食品, 顯然未能習慣, 只食咗樽果蓉同飲咗果汁, 雖然空姐比多份餐我哋, 但瞳瞳連我哋啲飯都唔食, 就尤得佢了. (可能上機前食咗我哋半碗通粉早餐). Landing 時可能氣壓改變, 瞳瞳不斷拍打耳仔 (應該係耳仔痛), 唯有再出動餅仔同飲水. 而降落時爸爸同佢扮騎馬, 所以著地嗰刻瞳瞳都玩得好開心. 就連後座嘅姨姨都贊瞳瞳叻女. 不過回程時就 ……. 可能因為眼瞓, 肚餓, 而且等咗好耐先 taking off ….. 瞳瞳發哂癲咁喊, 一路食餅, 一路喊, 一路話要食咀咀, 又不斷拍心口話驚驚 ……. 過咗好耐先喊到瞓著. 反而 landing 時就冇再出現耳仔痛.