買‧買‧買 <床上用品篇>

自從過咗 1st trimester 之後，體力回復，精神回復，而 shopping 慾也回來了！

除咗要幫自己選購吓新衣渡歲，今年仲要辦年貨、準備零錢封壓歲錢等等，而且更加要去行吓啲嬰兒用品，做好準備！

今日就襯剪完頭髮，過咗 logon 行咗個圈，終於比我等到佢減價了

由以往嘅 $20 一小瓶，而家只賣 $16 .. .. .. 由於一個人嘅力量有限，只好買小量，頂住先。﹝自從有咗小虎妹後，飲蘋果汁及凍檸茶先至令到我舒服一點﹞

之後就去咗火炭掃貨 .. .. .. casablanca 開倉呀！

原價 $8xx，平時一田賣 $5xx，今日開倉只賣 $390﹝如果我有剪低報紙嘅 coupon，仲可以減多 $30 .. .. .. ﹞

雖然小虎妹係女仔，但係有粉紅恐懼症嘅我，決定 .. .. .. 買藍色﹝希望小虎妹大個嘅時候唔好怪我啦！﹞

暫時只買咗 2 sets，一般都應該夠用﹝加多 1 set床單就應該夠﹞，不過小虎妹可能要喺婆婆處生活，可能要貫多 1 set，不過遲啲先算啦！

如果買芝士怪 (原來人哋叫海棉寶寶)嘅話，一套都只係 $319，仲平啲架！開倉開到星期三咋，大家有買就襯手！

我的名字 .. .. ..

早兩晚，papa 幫寶寶改咗個新花名 – 小虎妹！十分興幸好次懷有嘅唔係有 “咕咕”，要不然寶寶就會變咗 – 虎榮哥哥了！

真係好想小虎妹有一個哥哥呀！只可惜 .. .. ..

講開小虎妹個名，同一班同事喺 chat 嗰處傾開，唉！幫 auntie uncle 幫小虎妹改咗好多個 “名” 呀，真係十萬九千個 “感激”。

當中有 .. .. ..

梁粉

梁果

梁冰 à 娘炳

梁茶

梁親 à 娘親 / 涼親

Kat Leung à 貓糧

梁美 à 糧尾

梁涼地

梁茶鋪

MO, Leung Sum à 冇良心

梁心

Sum Leung à 心涼

梁地

梁山伯

梁地官

梁雨 à 乳娘

梁環 à 橫樑

梁有雙 à 有雙糧

哩班 auntie uncle 真係 .. .. ..

其實寶寶個英文名我已經唸好咗，不過想等 confirm 咗先再同大家講！想知道嘅 auntie uncle，記住密切留意嘞！

 

自從星期一比煤氣公司啲人激親後，個肚仔一路都有啲唔舒服 .. .. .. 唉！

稍後再同大家講啲激心嘢！

魔女‧宅急便

As Kwon 大減價，僅係要 call 齊姊妹齊齊 shopping 啦！不過日本提供嘅優惠，真係一年不如一年。以往只需買滿 三萬多日元，就會免費送貨，但現在連哩個優惠都取消埋 .. .. .. 唉！

 

今年好不容易集合咗大約 五萬多日元嘅 order，郵費 total 七千多日元，雖然除開大約每件衫多收廿十多塊港幣，但總係覺得冇以前咁抵，唔知下個年度嘅大減價，姊妹們仲會唔會咁踴躍呢？

 

不過由於我有一件貨品唔送唻香港，所以下次再 order 時，搵咗個澳門地址，到時就靠姊夫幫我攞返唻嘞！

今晚做咗個速遞員，點算及分派好貨品後，一次過派遞比我嘅尊貴客戶，好彩大部份都係沙田友！

帶住寶寶一齊做速遞，突然之間唸起一套卡通片 -- 魔女宅急便。一個女仔，帶住隻貓去送貨 .. .. .. 我隻貓喺邊 .. .. .. 喵！佢咪係虎 b 女囉！

暫時幫虎 b 女唸咗個英文名，短寫的話可以叫佢做 “KAT” -- > “CAT”，所以佢咪做咗魔女隻貓囉！

虎 b 女暫時又多咗一個花名 .. .. .. 小虎妹 .. .. .. wah！

第十七週 – 我係虎 b 囝 / 囡？

哩兩個禮拜真係大起大跌，喺我身邊發生咗 / 知道咗 好多事，有開心，有好唔開心，亦都有好激心嘅，笑過、喊過、鬧過，真係好想一一紀錄落唻，但奈何時間及精神有限，只有待後慢慢紀錄 .. .. ..

講返啲開心嘢先 .. .. .. 尋日去產檢，終於知道寶寶嘅性別了 .. .. .. 知道後雖然有點失落 .. .. ..

 

佢係一個虎 b 女呀！

我並唔係恨生囝囝，我都好鍾意囡囡 (超鍾意) .. .. .. 但我好想囡囡有個哥哥可以錫佢、保護佢 .. .. ..

而家就唯有我做多一份啦 .. .. ..

當知道係囡囡時，都考慮過咁仲比唔比麵包超人佢呢？因本人對 hello kitty and melody 等粉紅色人物冇好感 .. .. .. 最近決定 .. .. .. 狂買波點 .. .. .. 淺啡襯淡粉紅我都可以接受，一於幫佢唻個中性打扮啦 .. .. ..

嘩哈哈！七月初 “翻版黎美美將會誕生了” .. .. .. 又一個再世魔王了

我們的第一 .. .. ..！

早兩日收到美素佳兒嘅郵件 .. .. .. 只係喺網頁處登記個人資料吧！(第一個會藉)

表姐喺日本帶返唻比寶寶嘅黑超 b 口水堅  (其實仲想買黑超 b 嘅 bb 衫，可惜只係得 30% off .. .. .. )

and “小熊出沒注意”車尾牌！

今年收到嘅其中一份生日禮物 .. .. ..  (第一包片片)

而哩個係早兩年自己喺日本帶番唻嘅口水堅！(第一條 "堅")

雖然而家有你陪住我，但真的希望你能快點長大，再給予我多一點存在嘅感覺，比我知道你還在，沒有靜悄悄咁溜走 .. .. ..

Hello！ 大家好！

各位 auntie uncle！我將會喺年中出唻，同大家見面架嘞！

唔好咁心急啦！我自己都未識分自己係男仔 / 女仔，Dr. 話要過多幾個星期 (一月尾)先教我點分辨呀！

10月31日(第四週) -- 媽媽在出發往土樓之前幫自己做咗個測試，確實咗我嘅存在。不過媽媽仍然跟 aunties 們玩跳過水溪、攀山等高難道動作！

11月18日(第七週) -- 媽媽去咗搵 Dr. Wong 作檢查，佢哋見到我個心肝仔噗通噗通咁跳，仲話我已經通過咗第二個測驗！

12月29日(第十三週) -- 媽媽今次去咗搵 Dr. Cheung 做 Oscar，Dr. 除咗要攞媽媽啲血液去檢查吓我有唐士嘅機會率，仲要經超聲波量度頸皮厚度。嗰日我好頑皮咁同媽媽 and Dr. 玩咗好耐，我不停跳不停游，仲表演咗高難道動作『倒樹沖』，玩咗半個鐘我開始有啲攰，Dr. 就襯我瞓覺 b 嘅時候幫我度頸皮。最後驗血同量度嘅結果係屬於低風險！

啲 auntie and uncle 都讚媽媽勤力，但媽媽話佢都冇勤力過，只係話每個女仔，都做咗咁耐人囉，唔多唔少都了解自己身體嘅機能同時間分佈，媽媽只係喺適當嘅時間做適當嘅嘢啫！要不然已經製造咗千千萬萬嘅我，又或者千千萬萬個悲劇了！

媽媽仲話要追趕返失去嘅時間！

不過媽媽近排嘅身體都唔多好，前兩日仲不停打噴嚏同咳嗽，攪到我成日都冇得瞓，結果都係要去搵醫生叔叔！

唉！我唔鍾意食藥呀！